Percorriendu "Las Labradas"

Sobru una de las crestas de la Sierra de Carpurias, dominandu la veiga´l ríu Ería, situ nel términu municipal d´Arrabalde, provincia Zamora, alcuéntrase esti asentamientu ástur, amuralláu, del sieglu I a. C.

Anque los cabeiros indicios de la sua ocupación pertenecen a la Edá de Bronce, los restos principales son de datas finales de la Edá de Fierru.

Seique fou´l cabeiru llugar onde los ástures de la zona axuntónunse ante l´arribada l´exércitu román.

Anguañu vense los restos de la mayor parte las murallas y de dalgunas de las obras que fizun los sous pobladores pa resistire los asedios y cuidar las suas xentes y animales.

Percorriendu´l castru vemos deillos tramos de las murallas, cun una de las puertas refeichas y ruinas de las obras d´abastecimientu y almacenamientu d´augua.

El castru tubu defendíu nún de los sous llaos pur dúas murallas y nel trazáu del recintu aprovechónunse las dúas penas naturales (Pena Cantu y Pena Cedeira) ente las cualas fizun las murias de defensa.

Una vez dientru atoupámonos cuna Cá´l cabezaleiru, un amontonamientu cantos de xeitu circular que seique seyan los restos d´un pozu grande enforma cul que se podía abastecere la población tamién durante los cercos.

Na estaya oriental del castru ta la más fuerte las defensas que protexía la parte´l pobláu de más fácil entrada.

Dende la parte norte puede acolumbrase a mueitos kilómetros de distancia. Anguañu hai una fermosa vista d´Arrabalde y tola contorna.Van unos cuantos años alcontrónunse dúas ayalgas cun deillas xoyas d´ouru y plata.

Nel pueblu hai un Aula d´Interpretación del castru na que podemos conocer el xeitu de vida de los nuesos ancestros, nas suas cabanas de tollu y paya. Y la reprodución de fíbulas, brazaletes, torques y perendenges sírvennos pa conocere las costumes familiares nel xantar ou nel vestire.

El taller d´un orfebre cul fornu y los achiperres amuésanos cumu facían perendenges ou brazaletes cun motivos decorativos siempres sacaos del entornu natural.