jueves, 22 de enero de 2009

Dandu una vueltina pur Morla

El cabeiru pueblín de la comarca la Valdería yá na llende cun Cabreira, ye Morla de la Valdería. Un pueblu mueitu guapu arrodiáu de valles, fontes, castañales milenarias y un ríu d´auguas nidias y frías enforma, onde medra la reina llïonesa dende cuantayá; la trueita, de la que tantas hestorias cuntan los paisanos del llugar.
Peru agora vou falavos de toos esos llugares qu´arrodian al pueblu y qu´entá conservan el sou nome orixinal, cumu me dixu un vecín, Juán Castaño de Luis "You dígute´l nome cumu lu sintiera dicir a mieus pais, a mieus guelos, teya bien ou mal faláu."
Dende la carreteira pueden vese deillos sitios cumu: LA GRANDIELLA, onde berran los venaos na seronda; LOS PINIDIELLOS, al llaú la carreteira onde anguañu recueyen fuyeques (cogorda ou péu de llobu); EL CAMÍN DE LA CHANA, que xube pula traseira´l pueblu y chega a LA LLAMIELLA, onde tán las escuelas peichadas va bien de tiempu.
Tamién hai deillos llugares cul nome de ÑAVALES (onde medraban los ñavos), un FORNU, onde ca vecín plantaba una castañal en tarrén comunal y ye de sóu anque nun haiga escritura denguna; eillí tien Gildo una que chama LA FORCADA.
Outru sitiu ye EL FECIEYU, onde termina´l camín los truébanos.
Al llaú´l ríu hai una BOUZA, tarrén que s´amburaba n´hibiernu y después semaba de centenu. Y na raya cun Torneros de la Valdería, ta LA FERVIENZA, onde se bañan los rapaces nel branu.
Pul camín enrriba´l pueblu que ye chanu, chegamos a LA CEMBA, onde tien Quico la parcela enchena frutales. Pa tornare pa baixu miyor dire pul camín de RODEIRA VIEYA.
EL BARREIRU ye la tierra que cultivan cumu guertu purque tien augua pa regare pul pie.
Antañu venía xente de tolas estayas del Reinu a EL FUEYU pa tomare las auguas minerales de fierru, que dicían yeran bonas pa la salú.
N´esti pueblu entá chaman a facendeira, pur exemplu esti añu fízuse pa segare la yerba LA LLAMIELLA, onde toos eichonun un gabitu y pa llimpiare la fonte mineral.
Dalgunos quieren falare cuntiéu pa cuntare las suas hestorias y pasar un ratín charrandu, a la vez que te convidan a que vaigas pur una mostada castañas pal amaguestu.
Las xentes de Morla paseyan pula carreteira que nos aveira a Cabreira, y tien pur vezu chegar ata la ponte LA FORMOSINA, onde asocediera cuantayá´l bien conocíu asaltu de Girón; peru esa ye... outra hestoria.
Al pasar el pinal, enantias de chegar a Morla, alcontramos a manzorga LA CAGAYA, y a mandreicha CAMINANCHU.
En LA MASEIRA´L BALEAR, diz la xente que llavaban l´ouru los romanos.
LA YERA, LA DEBESA, EL PEDRÓN, LA RETUERTA, VEIGASPINU, EL BERNARDIELLU, LA FONDANADA, LAS CAYUECAS, LOS CARBAYONES, FUEYOS DE VELDÉU, LAS MOYADAS, VAYUCUEVU, EL PICARUCHU, LA LLAMONA, LOS ESCALEIROS, LAS ORONAS, LA FONDANAL, REGEIRA COUSU, son outros de tantos nomes de llugares en Morla.
Onde Tomasín atroupa las castañas ye LA CASTAÑAL LA GOMININA.
Y yá nel pueblu alcontramos EL CAÑEIRU, qu´entama onde vive Joselín y fina onde Quico, pasandu pulas guertas de POMEDIU.
De xuru que nun tarán tolos que son, peru son abondu pa facenos ideya de la guapina toponimia que nos nuesos pueblos pasara dende cuantayá, de bouca en bouca de pais a fiyos, dica guei.
Y pa finare, gracias fondeiras a tolos morletos que m´allumbronun cual llumbreiru de quiruega pa podere dar a conocer toos estos nomes tan de nuesu.
http://personal.telefonica.terra.es/web/morla/index.htm

8 comentarios:

  1. Guapu articulín. Presta gueyar deillos blogs na nuesa Llingua LLionesa. Deseyo qu'ésti que ñaz agora durge mueitos años, -aspero que seya asína-.

    Un saludu a la xente de Morla

    ResponderEliminar
  2. Gracias fondeiras pulos tous deseyos. Esperemos qu´ésti dure mueitu y que ca vegada haiga más.

    Un saludu.

    ResponderEliminar
  3. Noraboba pul tou blog. Yá vamos siendu mueita la xente qu'anímase a escribire na nuesa llingua na rede.

    Un saludu

    ResponderEliminar
  4. Mueitas gracias. Nun conocía´l tou blog, mui interesante.
    Un saludu.

    ResponderEliminar
  5. Guapísimu esti blog na nuesa llingua llïonesa. Norabona y cuntare cumiéu.

    ResponderEliminar
  6. Milentamil gracias pul comentariu y pula visita. Esperamos que vos siga prestandu.

    Saludos.

    ResponderEliminar
  7. Norabona pul tou blog, ye de lu muyor qu´hai y n´espicial aquesti artícolu nel que dasnos una amuesa de la toponímia llionesa; que ye´l terrén onde más vixencia y vitalidá tien la nuesa llingua.
    Habemos a desixire que mos pongan retulación billingue sobrutóu na macrotoponímia que ye onde más mutaciones castellanizadoras se tienen feichu.

    ResponderEliminar
  8. Pues sí, afortunadamente na toponimia menor la llingua caltiense y pervive al traviés de los años.
    Taría mui bien vere dalgún día la siñalización billingue...tou s´andará.
    Mueitas gracias pula tua visita y un saludu.

    ResponderEliminar