Falare llïonés presta asgaya

Valdavíu: Castiellu del "Conde Peña Ramiro"

2011-07-08T05:33:00.000-07:00

Valdavíu ye un pueblu del suroeste de Llión que pertenez al municipiu de Trueitas, en Cabreira Alta, afitáu a 1130 metros d´altitú. A 1367 metros, en Valcaliente, alcuéntranse las ruinas del Castiellu del "Conde Peña Ramiro", feichu durante la dominación visigoda sobru las ruinas d´un castru romanu. La presencia romana n´esta zona tien que vere cuna desplotación mineira d´ouru, cumu sabedes.
Durante la xubida al Castiellu, podemos almirare unas prestousas vistas de Valdavíu y la flora típica de la zona n´estas datas braniegas, ente outras el piornu y la dedaleira, que tiñen d´amariellu y púrpura los montes llïoneses. Tamién podemos acolumbrare dende lu altu´l Castiellu outros pueblos de la zona cumu Trueitas, La Cuesta, Cunas...

Volvariella bombycina

2010-11-05T04:52:00.000-07:00

Tamién conocida cumu Volvaria sedosa, esta seta pertenez al orde Agaricales y ye una especie saprófita poucu frecuente que vive sobru árboles de fueya caduca. N´esti casu sobru´l tueru un choupu.

Fomes fomentarius

2010-10-26T05:39:00.000-07:00

Esti yesqueiru, asemeyáu a un cascu de caballu, cumu tamién se ye conoz, rucha y medra en madeira viva ou muerta de planifolios, sobrutóu choupos, fayas ou abedules, tol añu. Ye una especie mueitu frecuente.

Más setas...Boletus satanas

2010-10-26T04:12:00.000-07:00

Cumu la variedá de setas que ruchan nos nuesos montes ye grande asgaya, diréi xubiendu las semeyas de las que vaiga alcontrandu esti otoñu, y que nun tuvi la suerte d´alcontrare l´otoñu pasáu. ¡Que vos preste!. Esti boletu, conocíu cumu Boletu de Satanás, ye una especie poucu frecuente, que medra sobrutóu baixu carbayos y ancinas pul branu y l´otoñu. Ye mueitu tósicu.

Aliviadeiru nas Canales romanas de Llamas

2010-09-14T04:11:00.000-07:00

Cuandu l´augua venía cun crecida y pa evitare que la fuercia la corriente deteriorara´l cauce la canal , eichábase l´augua sobrante pul aliviadeiru.

Túnel nas Canales romanas de LLamas

2010-09-14T04:06:00.000-07:00

Los túneles abríanse p´atravesare los crestones rocosos y evitare facer un llargu tramu d´oubra arrodiandu l´espolón.

Canales romanas de Llamas de Cabreira

2010-09-14T03:22:00.000-07:00

N´esti piqueñu pueblu de Cabreira baixa, al sur de los Montes Aquilanos y a unos 900 m. d´altitú, alcuéntrase la mayor rede hidráulica mineira conocida, en palabras del sou descubridor, l´Inxenieru Téunico de Minas, Roberto Matías.

Fou descubierta nel añu 2002 pula asociación Promonumenta, durante los trabayos de llimpieza de las canales que llevaban l´augua a Las Médulas.

N´estas desplotaciones a cielu abiertu y baixu tierra, los romanos utilizonun la manu d´oubra llariega y de la contorna, que taba a las órdenes del "Procurador Metallorum", representante del Emperador, cun sede n´Asturica Augusta (Astorga), capital de tol Conventus Asturum. Éstos yeran homes xurídicamente llibres, forzaos a facer estos trabayos cumu tributu pal Estáu román.

Pa la desplotación d´esta mina d´ouru yera indispensable l´abastecimientu continuu d´augua a la mina, pulu que se fizu una rede de canales grande enforma. Esti augua venía de los ríos Cabreira, Oza y Eria. Los téunicos encargaos de dirixire las oubras formaban parte del exércitu román, yeran los chamaos inxenieiros "libradores".

Las ferramientas utilizadas yeran mueitu senciellas, de madeira y fierru, feichas nel pobláu metalúrxicu d´Orellán (Médulas).

Nel añu 2005, Roberto Matías, promovéu la declaración del parax cumu "Bien de Interés Cultural", petición entá nun resuelta pula Junta.

Paga la pena visitar esta impresionante rede de canales, pa conocer un capítulu más de la interesante hestoria de la nuesa tierra, y decatase cun tristura una vez más, del olvidu y abandonu al que ta sometida.

La "Cruz de Fierru"

2010-02-01T12:28:00.000-08:00

Afitada na cumbre´l Monte Irago, a unos 1500 m. d´altitú y a 1 km. de Foncebadón, na comarca de Maragatos, alcontramos la chamada "Cruz de Fierru".

Hai mueitas teorías alrodiu los oríxenes d´esti importante símbolu del Camín de Sayagu. Según unos, los sou oríxenes sedrían paganos, un ritu pul que los caminantes aportarían la sua piedra al montón, cumu ufierta a los dioses. Estos amontonamientos de cantos taban nos cruces de caminos. Más tarde cuna dominación romana, convertiríanse nos chamaos "Montes de Mercurio". Según outros, sedría namái una maneira de señalare la delimitación de tarrenos. N´esti casu, el cotu que´l Rei de Llión Afonso VI, nel añu 1103, concede al ermitañu Gaucelmo cuandu ésti funda un alberge, un hospital y una eigrexa p´asistir a los pelegrinos del Camín.

Mina d´ouru "Fuco chico"

2010-01-28T10:16:00.000-08:00

Esta mina d´ouru, afitada a la vera´l Telenu, ente Priaranza de la Valduerna y Luyego, ye seique la más grande´l ríu Ornia (Duerna).

El sistema d´esplotación utilizáu pulos romanos nel sieglu I, fou n´esti casu´l d´"arrugia", nel que l´augua arrastraba l´ouru que se depositaba nas lladeras de los ríos Ornia (Duerna) y Eria. De los más de 38 kilómetros cuadraos d´esplotaciones auríferas del Telenu, sacábanse unas seyes toneladas d´ouru al añu. Anguañu la mayor parte los yacimientos romanos alcuéntranse na zona militar.

Ya nel añu 1971, fízunse unas escavaciones a cargu´l prestixosu arquiólogu francés Claude Domergue qu´años más tarde aseguraba nuna entrevista al Diario de León que: "El Teleno puede ser un museo al aire libre". Y más recientemente en 2006 l´Inxenieru téunicu de Minas y Profesor de la Universidá de Llión Roberto Matías, nel "Congreso sobre Obras Públicas Romanas" declaróu que yera la mayor mina romana d´ouru que se conoz, y pidíu la declaración de Patrimoñu de la Humanidá.

"La perla´l sieglu XII"

2010-01-26T05:10:00.000-08:00

Cun esti guapu nome ye conocida la Catedral de Zamora. De xeitu románicu, y dedicada a El Salvador, fou costruyida nel sieglu XII, ente los años 1151 y 1174. Patrocinada pul Rei de Llión Alfonso VII el Emperador y sua harmana Sancha.

La planta de cruz llatina tien tres naves, y nel cruceiru un cimborriu cun un tambor de 16 ventanas cun una cúpula asemeyada a las bizantinas. De las tres puertas orixinales, la única que se mantién dafeichu ye la "Puerta del Obispo".

Fou declarada "Monumento Histórico-Artístico" en 1889.

Castiellu de Zamora

2010-01-24T12:45:00.000-08:00

Esta fortaleza, que data de mediaos del sieglu XI, abríu de nuevu las suas puertas el branu pasáu, tras cuatru años d´obras de restauración. Fou mandáu costruyire pul Rei de Llión Fernando I, Conde de Castiella, navarru que casóu cun doña Sancha, heredera de la Corona a la muerte de sou harmanu´l Rei Bermudo III, que morréu ensin descendencia.De planta romboidal, tien tres torres (dúas pentagonales y outra heptagonal), fosu, contrafosu, lliza, estancias y patiu interior. Sieglos más tarde fou reformáu baixu´l reináu de Felipe V pa las nuevas téunicas de gerra. Dende 1931 tien la másima proteición dientru´l Patrimoñu Históricu Hespañol. Paga la pena visitar esta importante fortaleza medieval, símbolu de la ciudá de Zamora, dende la que se pueden acolumbrar unas fermosas vistas de la Catedral.

Amanita rubescens

2009-11-23T03:49:00.001-08:00

L´Amanita rubescens pertenez al orde Agaricales y medra sobrutóu en biescas (coníferas), anque tamién baixu planifolios, y rucha de branu a otoñu. Tamién conocida cumu sangradeira ou feridona.

Russulas

2009-11-22T08:39:00.000-08:00

Del orde Russulales hai especies ambute, dalgunas d´eillas mueitu asemeyadas. Puru clasificalas ye abegosu enforma. Estas semeyas amuesan dúas especies de Russulas ensin clasificare qu´alcontréi baixu pinos n´esti casu.

Fistulina hepatica

2009-11-20T12:37:00.000-08:00

Conocida popularmente cumu "Lengua de buey, hígado de buey", pertenez al orde Aphyllophorales. Ye un parásitu de castañales y carbayos vieyos que rucha de branu a otoñu.

Hypholoma fasciculare

2009-11-20T11:46:00.000-08:00

Esta seta tósica del orde Cortinariales, rucha en forma fasciculada sobru madeira planifolios y coníferas tol añu.

Coprinus comatus

2009-11-20T11:26:00.001-08:00

Conocida popularmente cumu "Barbuda", esta seta del orde Agaricales medra en xardines, a la vera los caminos, escombreiras, ecétera, pul branu y l´otoñu. Ye mui bon comestible cuandu las lláminas tan blancas.

Macrolepiota rhacodes

2009-11-20T11:18:00.000-08:00

Esta especie del orde Agaricales, más pequeña que la Macrolepiota procera, medra en silvas y biescas pul branu y l´otoñu, y ye un bon comestible.

Lepista nuda

2009-11-20T10:30:00.000-08:00

Tamién conocida nel País Llïonés cumu Xeta xardón, Cogorda la fueya (Llión) ou Seta d´ancina (Zamora). Del orde Tricholomatales. Esta fermosa seta violeta, medra en carbayales, ancinares, pinales y tamién praos. Rucha n´otoñu ya hibiernu onde abondan las fueyas, y tamién puede alcontrase en febreiru y marzu.

Lactarius deliciosus

2009-11-20T10:09:00.000-08:00

Míscarru, Ñícaru (Norte Zamora), Ñíscarru (Suroeste Llión), Fungu lleitariegu, Lleiteiru (Cabreira baixa llïonesa), asina conocemos en tol País Llïonés a esta deliciosa seta del orde Russulales, que medra en pinales y rucha dende finales d´agostu ata avientu, siendu el miyor mes, outubre, anque estí añu de chuvias tardías tamién l´alcontramos en noviembre.

Stropharia aeruginosa

2009-11-20T02:14:00.000-08:00

Esta chamativa seta verde del orde Agaricales, medra sobru restos vexetales en silvas y biescas y rucha de branu a otoñu.

Tricholoma equestre

2009-11-19T12:11:00.000-08:00

Conocida popularmente cumu "Seta de los caballeros", del orde Agaricales, medra en biescas (coníferas) y rucha pul otoñu y entamu l´hibiernu. Davezu apaez mui enterrada.

Stropharia semiglobata

2009-11-19T04:37:00.001-08:00

Esta especie que pertenez al orde Agaricales, carauterízase pul sou hábitat coprófilu, medra sobru escrementos d´animales. Rucha pula primaveira y el branu.

Collybia butyracea

2009-11-19T04:05:00.000-08:00

Tamién del orde Tricholomatales, medra nel mesmu hábitat que l´anterior, n´humus de biescas de montaña, y rucha tamién pul otoñu.

Tricholomopsis rutilans

2009-11-19T02:34:00.000-08:00

Especie mueitu común del orde Tricholomatales que medra en biescas de montaña, y rucha pul otoñu. Davezu alcuéntranse a la vera ou sobru tocones de pinos cumu amuesan las semeyas.

Ramaria aurea

2009-11-18T13:45:00.000-08:00

Especie poucu común del orde Aphyllophorales. Medra en biescas (coníferas), y rucha ente xullu y outubre. Ye bon comestible cuandu xoven.Tamién se conoz cumu Clavaria aurea.

Sarcodon imbricatus

2009-11-18T11:43:00.000-08:00

Tamién conocida en Llión cumu Piel de oso ou Pelleyu d´osu, y en Zamora cumu Seta de corza ou Cacaforra de corza. Pertenez al orde Aphyllophorales. Medra en biescas sobrutóu de pinos y rucha dende finales del branu ata finales d´avientu inclusu en xineiru, purque aguanta bien las xeladas.

Leccinum duriusculum

2009-11-17T02:24:00.000-08:00

Del orde Boletales, medra baixu planifolios, sobrutóu choupu blancu y abelul, y rucha pula primaveira y l´otoñu.

Xerocomus parasiticus

2009-11-17T02:16:00.001-08:00

Esta seta del orde Boletales mui rara d´alcontrare, parasita outras del xéneru Scleroderma, y rucha pul otoñu.

Suillus luteus

2009-11-14T10:35:00.000-08:00

Esta seta del orde de los Boletales tamién se conoz cumu Funganiellu´l pinu ou Cacaforra de pinu. Medra esclusivamente en pinales sobru tarrenos frescos, y ye bon comestible, peru convién quitaye la cutícula pulos sous efeutos lasantes. (Na semeya d´abaixu apaez xunta una Amanita muscaria).

Boletus pinophilus

2009-11-11T02:48:00.000-08:00

Del orde Boletales esta seta tamién conocida cumu Xetu, Seta de pino,ou Cogorda´l pinu bravu, rucha pula primaveira, el branu y l´otoñu en pinales, abetales, fayeos y castañales. Y ye un comestible bonu asgaya.

Outras setas

2009-11-09T12:56:00.000-08:00

Estas outras setas que tan ensin clasificare tamién amuesan la bayura los nuesos montes.

Coprinus micaceus

2009-11-05T11:29:00.000-08:00

Del orde Agaricales, esti Coprinus medra en grupos cespitosos, en praos ou a la vera los árboles, y rucha dende primaveira ata otoñu.

Leucopaxillus candidus

2009-11-05T11:10:00.000-08:00

Conocida popularmente cumu Cándida (blanca), esta seta del orde de los Agaricales rucha tras las chuvias pul branu y l´otoñu. Medra en pradeiras montañosas en corros de bruxas (en grupos), y ye un bon comestible.

Amanita pantherina

2009-11-04T12:42:00.001-08:00

Esta seta del orde de los Agaricales medra en silvas de carbayos y fayas y tamién en biescas (abetos y pinos), y rucha dende mediaos de branu ata mediaos d´otoñu. Ye venenosa y puede provocar graves intosicaciones.

Boletus edulis

2009-11-04T12:32:00.000-08:00

Esta seta del orde de los Boletales ye conocida tamién cumu Cogordu, Cogorzu y Viriatu. Medra en biescas y silvas de carbayos, fayas, castañales, ecétera. Rucha dende´l branu ata l´entamu l´hibiernu. Tamién ye un fungu del que s´alimentan mueitos animales cumu mures, topiellos roxos, esgilos, coneyos, venaos, corzos, osos, vacas, ouveyas, cabras, ...

Agaricus campestris

2009-11-01T11:58:00.001-08:00

Más conocíu cumu Champiñón, esta seta del orde Agaricales, medra abondu en praos onde pastan ouveyas, vacas, yeguas; eras, claros de silvas, mayadas y a la vera los caminos. Rucha tras las chuvias cuasimente tol añu, sobrutóu pula primaveira y l´otoñu. De las cuatru especies principales d´Agaricus, tres son comestibles y una tósica: l´Agaricus xanthodermus.

Amanita muscaria

2009-10-31T10:50:00.000-07:00

Del orde de los Agaricales. Tamién conocida cumu Canina, Canina roxa (Cabreira llïonesa); Seto rojo, Xetu roxu (Aliste en Zamora). Una de las setas más guapas del monte, sicasí ye venenosa. Medra en silvas de fayas, ancinas y abedules, y en biescas. Y tamién apaez en xaras. Ye una especie mueitu apreciada cumu inseuticida natural, d´ehí outru de los nomes pulos que tamién se la conoz: Matamoscas. Tien amás dalgunas propiedaes farmacolóxicas.

Agrocybe aegerita

2009-10-30T04:00:00.000-07:00

Esta seta del orde de las Tricholomatales ye conocida popularmente cumu Seta de palera (Bretocino en Zamora ou Valderas en Llión) ou Cogorda´l choupru ente outros. Medra sobru tocones, raigones y troncos vieyos d´árboles (chopos y álamos sobrutóu). Rucha n´agostu, setiembre y outubre tras las chuvias. Ye un bon comestible cuandu xoven.

Lycoperdon perlatum

2009-10-29T10:22:00.000-07:00

Del orde de las Lycoperdales. Cumu nel casu´l cucurril esta seta tamién tien deillos nomes nel País Llïonés: Cacaforra (La Carballeda y Valle de Tera en Zamora); Cacaforru (Valle de Tera); Fungu (San Ciprián na Senabria, Mombuey, Villar de los Pisones, Donáu...en Zamora); Fungueiru (Utreira las Duernas en Zamora); Funganiellu (Anta de Rioconeyos en Zamora); Fungón (Trueitas en Cabreira llïonesa); Fulleque (Morla de la Valdería en Llión); Pantorros (Mieza en Salamanca); Cagajorras (Almendra en Salamanca); Ciscu llobu, Jiscu de llobu (centro y noroeste de Llión).
Medra sobru restos vexetales en biescas y silvas y rucha n´otoñu. Esta seta yera utilizada pulos pastores cumu desinfeutante y antibióticu pa las feridas del ganáu, cumu amuesa esti dichu de la Carballeda zamorana: "Cuéyese´l mofu y dase na firida". En Llión los curandeiros y los barbeiros utilizábanlu en polvu. ("HONGOS Y SETAS. Tesoro de nuestros montes". Juan Andrés Oria de Rueda. (Coord.), editorial CÁLAMO)

Macrolepiota procera

2009-10-29T03:30:00.001-07:00

Del orde Agaricales. Toos estos nomes que vienen darréu son dalgunos pulos que se conoz esta seta en tol País Llïonés: Cucurril, Cucumiellu, Cogomiellu (Senabria y La Carballeda en Zamora); Roquil (zonas de La Carballeda zamorana); Roquetes de Crisitanu (Aliste en Zamora); Cogomillo (Sayagu en Zamora y Salamanca); Cogolmillu (La Alberca y sur de Salamanca); Cogordu, Cucurrín (Castrocontrigu en Llión); Cucuxiellu (Ancares llïoneses pur Burbia); Cucuxeiru (Donáu y las Duernas en Zamora, Valdavíu en Cabreira llïonesa); Cogorzu (Valdería llïonesa); Faradiellu, Cogollu ou Cubeta (Galende en Zamora); y en Tierra de Miranda: Roco, Roquiello, Frades, Fusa y Marifusa.
Dalgunos d´eillos téngulos sentíos, peru la información ta sacada del llibru "HONGOS Y SETAS. Tesoro de nuestros montes" de Juan Andrés Oria de Rueda (Coord.), editorial CÁLAMO. Rucha tras las chuvias pula primaveira, l´otoñu, el branu ya hibiernos suaves. Y medra en praos, silvas y tarrenos abonaos pur animales. Ye un bon comestible que tien proteínas abondu.

Laetiporus sulphureus

2009-10-28T12:57:00.000-07:00

Conocida cumu Poliporu azufráu, del orde de las Aphyllophorales, medra en troncos d´árboles muertos, ou n´árboles vivos a los que va pudriendu. La de la semeya ta nel troncu d´una castañal seca.

Pleurotus eryngii

2009-10-28T09:47:00.000-07:00

La seta de cardu, oureya´l cardu, cogorda de cardiellu, seta de gayola (Zamora) pertenez al orde Agaricales. Rucha pula primaveira y l´otoñu y medra en baldíos, a la vera los caminos y nos praos onde hai cardu corredor (Eryngium campestre), y pastan las ouveyas. Considerada gastronómicamente escelente, tien amás propiedaes antiosidantes.

Ganoderma lucidum

2009-10-28T02:37:00.000-07:00

Conocida popularmente cumu la Pipa, esta cogorda del orde Aphyllophorales medra n´ancinares y carbayales. Ye una seta utilizada dende cuantayá na melicina oriental en China y Xapón (onde ye conocida cumu Reishi) escontra la falta de suañu y tamén hai investigaciones nas que ye utilizada escontra´l cáncer. Y pa tratare la diabetes purque baixa los niveles de zucre nel sangre.

Boletus aereus

2009-10-27T12:26:00.000-07:00

Del orde de los Boletales. Tamién conocíu cumu Cogorda ñigral, Viriatu mouru ou Fungu mouru. Medra nos alcornocales, ancinares, castañales y carbayales, y rucha dende finales de primaveira ata l´entamu l´hibiernu. Ye una cogorda mui valorada cumu comestible.

L´interesante reinu Fungi

2009-10-27T12:04:00.000-07:00

Pur fin chegóu l´otoñu y cun él las tán esperadas chuvias d´outubre, pulas que tamos naguandu tolos aficionaos a la Miculoxía.
Cesta y navaya en manu, una mínima conocencia na materia, mueita gana d´adeprendere, de pasalu bien, de disfrutare de la Natura, y sobrutóu mueitu respetu pul entornu, ye tolu que necesitas pa conocer el prestousu reinu Fungi.
Cumu toos sabedes hai mueitas clases de cogordas. Deillas son comestibles, outras melicinales, y outras venenosas y dañibles pal organismu.
Eiquí déixuvos unas semeyas cunas qu´alcontréi nas mias salidas al campu, y una piqueña desplicación de las suas carauterísticas y propiedaes.

Ancina

2009-10-11T09:36:00.000-07:00

(Quercus ilex). L´ancina ou algeira ye un árbol de la familia de las Fagaceae, d áta 20 m. El sou frutu, las bellotas, maduran d´outubre a noviembre y son utilizadas p´alimentar a los gochos. La madeira l´ancina val pa facere carros, araos, ferramientas, pilares, vigas, y tamién ye bona pa facere lleña y carbón vexetal. Contién taninos y saponinas, pulu que s´utiliza cumu astrinxente y pa curtire pelleyos.

Mayuelu

2009-10-10T05:45:00.001-07:00

(Crataegus monogyna). El mayuelu ou espinu albar ye un arbustu de fueya caduca, de la familia de las Rosaceae, que puede algamar ata 6 m, cun ramas convertidas n´espinas. Florez n´abril y mayu, y nas montañas ata xunu. El sou frutu ye redondu, encarnáu y cun un solu guesu que madura d´agostu n´adelantre. Medra ente outros árboles, nos torrentes y a la vera los sembraos. Las suas flores utilízanse cumu tónicu pal coral, cumu sedantes, antiespasmódicas y pa baixare la tensión del sangre, ente outros.

Carbayu

2009-09-28T12:38:00.001-07:00

(Quercus robur). El carbayu ye un árbol de la familia de las Fagaceae d´ata 50 m. El sou frutu, las bellotas, maduran a la fin del branu y cayen al escomencipiare l´outoñu. Ricos en taninos y flavonoides, la corteza, las fueyas y el frutu tienen propiedaes antiinflamatorias, astrinxentes, pa tratare la farinxitis, las almorranas y las varices ente outras. Tamién utilizáu dende cuantayá pa curtire pelleyos. La madeira´l carbayu val pa facere toneles, muebles, traviesas de fierrucarril, ecétera.

Clavelina

2009-09-11T08:30:00.000-07:00

(Dianthus hyssopifolius). Tamién conocida cumu clavel de pastor, clavel de monte. Pertenez a la familia de las Caryophyllaceae, medra en pastos, montes, y florez pur primaveira y branu.

Conxal

2009-09-02T01:35:00.001-07:00

(Juglans Regia). La conxal ou nugal, ye un árbol de fueya caduca, de la familia de las Juglandaceae d´ata 30 m. Los sous frutos (los conxos) son ricos en proteínas, minerales y vitaminas. Las fueyas y la nugalina (cáscara verde del frutu) tienen taninos abondu, pulu que s´utilizan cumu astrinxente. Tamién tienen propiedaes cicatrizantes y vermífugas. Y son amás mui utilizaos pa tratare trastornos xinecolóxicos, escontra´l colesterol, las almorranas, pa las feridas y pa baixar el nivel de zucre nel sangre, ente outros.

Los conxos atróupanse n´outoñu.

Figal

2009-08-24T04:53:00.000-07:00

(Ficus carica). La figal ye un árbol de la familia de las Moraceae que puede medrar ata 10 m. El frutu, lo figos, son ricos en zucres, minerales, vitaminas y mucílagos que protexen las mucosas internas. Combaten l´estreñimientu, la reuma, la bronquitis, los problemas de la bouca, y las verrugas. Dalgunas variedaes de figales tamién dan amás de figos, brevas.

Cardos

2009-08-23T07:37:00.000-07:00

Cun esti nome conocemos desemeyadas especies de la familia de las Asteraceae. Dalgunas son comestibles, poucu calóricas, depurativas, bonas pal fígau, la vesícula, la diabetes, el colesterol, l´estreñimientu y los guesos pul sou conteníu en calciu. Medran a la vera los caminos y campos, anque tamién se cultivan.

Parra

2009-08-23T05:19:00.001-07:00

(Vitis vinifera). La parra ou vid ye una planta trepadora de la familia de las Vitaceae. El sou frutu, la uva, ye ricu n´augua, zucre, vitamina C y taninos ente outros. Cun él fácese´l vinu (mostu fermentáu) y tolos sous derivaos: alcol, vinagre, ecétera. Las fueyas de parra sirven pa combatire la descomposición, tonificare la circulación, curare las almorranas y en polvu pa curtiare las hemorraxas nasales, y el zumu d´uva pa baixare la calentura y escontra los vómitos y los ataques d´acetona. La vendimia entama a finales de setiembre ou principios d´outubre.

Peral

2009-08-22T04:27:00.000-07:00

(Pyrus communis). La peral ye un árbol de fueya caduca, de la famillia de las Rosaceae que puede medrar ata los 20 m., y qu´aguanta miyor el fríu que la calor. El sou frutu, la pera, tien vitamina A, C, B1, B2, B12, calciu, fósforu, manesiu, fierru, azufre, siliciu, sodiu, potasiu. Tien propiedaes astrinxentes, y la infusión de fueyas ye utilizada escontra la retención d´orina.

Zarzal

2009-08-21T03:22:00.001-07:00

(Rubus fruticosus). Esti arbustu de la familia de las Rosaceae, d´ata 2 m. medra en matorrales, setos, claros de silvas y a la vera los caminos. Las flores son blancas ou rosadas y el frutu, las mouras, verdes y encarnadas cuandu tan royas y prietas cuandu maduran. Son ricas en vitamina A y C, y en potasiu, pulu que s´emplega cumu diurética, pa tratare la descomposición, la irritación de gañote, la diabetes, la reuma, las almorranas. Y pa facere compotas, tartas, vinos, ecétera.

Yedra

2009-08-19T12:09:00.001-07:00

(Hedera helix). Esti arbustu trepador de la familia de las Araliaceae que puede algamare los 2 m. tien dous tipos de fueyas, unas ovaladas y outras divididas en tres ou cincu llóbulos verde escuros. Xorrez en cualquier tarrén y tolera bien la solombra. El frutu ye venenosu y destruye los glóbulos roxos. Y la planta contién ederina que ye la causante de la sua tosicidá. Peru bien utilizada sirve pa tratare la tensión alta, la reuma, pa cicatrizare feridas, y pul sou conteníu en saponinas pa las varices y la celulitis.

Arroyuela

2009-08-16T10:34:00.001-07:00

(Lythrum salicaria). Esta planta de la familia de las Lythraceae puede medrar ata 1,5 m. Tamién chamada "salicaria ou frailecillos". Las flores tienen seyes pétalos púrpura. Medra en zonas cun mueita augua, a la vera los regatos, ríos, acequias ou praos encharcaos. Florez tol branu, y ye bona escontra la enteritis de los rapacines, la descomposición y tamién cumu cicatrizante.

Castañal

2009-08-14T05:38:00.001-07:00

(Castanea sativa). La castañal ye un árbol de la familia de las Fagaceae que puede algamare los milenta años. Florez en xullu y el frutu (la castaña) atrópase n´outubre. La flor masculina apaez n´espigas amariellas (semeya d´enriba), y la femenina al cabu´l tiempu son los ouricios (semeya d´abaixu) d´onde salen las castañas. Las castañas tienen proteínas, sodiu, potasiu, fósforu, fierru, calciu y deillas vitaminas, pulu qu´antañu fonun mui importantes pa l´alimentación de presonas y ganaú, sobrutóu gochos. La corteza y las fueyas tienen propiedaes escontra la tos y los males de la bouca y el gañote ente outras. Y la madeira val pa facere muebles, cestos, istrumentos musicales, ecétera.

Arraclán

2009-08-14T04:58:00.000-07:00

(Rhamnus frangula). Ablaniellu, frángula, sanguesa. Ye un arbustu d´ata 7 m. que medra en silvas, veigas, a la vera los caminos y setos. De la familia de las Rhamnaceae. Bien conocíu cumu purgante suave y mueitu eficaz, que nun creya vezu. Tamién tien propiedaes vermífugas y emenagogas ente outras. Utilízase la corteza seca. Los frutos, verdes y encarnaos al entamu y prietos cuandu maduran, son tósicos.

Triaca

2009-08-14T03:54:00.000-07:00

(Veronica officinalis). Outros nomes pulos que se la conoz: verónica ou Té d´Europa. De la familia de las Scrophulariaceae. Rucha a mediaos de la primaveira y medra en praos secos, silvas, pastos y matorrales de montaña. Utilízase pa la pesadez de bandullu, la falta de fame, pa la tos, la reuma, los males del riñón, escontra la gota, pa curare feridas, pal asma...Y nel norte d´Europa utilízase en vez del té, pul sou efeutu tonificante natural.

Xaboneira

2009-08-13T11:53:00.000-07:00

(Saponaria officinalis). Saponaria, yerba bataneira, yerba xaboneira son ente outros los nomes pulos que se conoz a esta yerba que puede medrar ata 1 m. De la familia de las Caryophyllaceae, las fueyas y el raigañu tienen propiedaes diuréticas y depurativas y utilízanse tamién pa tratare l´artritis ou la bronquitis ente outras. Tamién fou utilizada pulos bataneiros pa desengrasare la llana, pulas propiedaes detersivas que tien la raigame al contautu cul augua. Medra en ribeiras y sotos y florez de mayu a setiembre.

Sabugu

2009-08-13T09:06:00.001-07:00

(Sambucus nigra). Tamién conocíu cumu saúcu,sabucu, canilleiru. Pertenez a la familia de las Caprifoliaceae. Medra en silvas, a la vera los caminos y nos guertos, y puede algamar ata 10 m. Florez pula primaveira y al entamu´l branu. Tien propiedaes calmantes, antiinflamatorias, depurativas, purgantes y escontra´l romaízu ente outras. Cunos frutos maduros pueden faese mermeladas, vinagre, vinos. Cuandu tan royos son tósicos.

Agavanzu

2009-08-13T07:35:00.001-07:00

(Rosa canina). Tamién conocida cumu "rosal silvestre, escaramujo, tapaculos". Ye un arbustu d´ata 5 m cunas flores blancas ou rosadas. Medra en sitios soleaos. Utilízase p´aliviare la inflamación de gueyos, escontra la fueira (tapaculos), y cuandu´l frutu (escaramuxu), ricu en vitamina C, ta maduru amestáu cun zucre en mermelada, sirve pa combatire l´escorbutu.

Pomal

2009-08-04T04:57:00.000-07:00

(Malus domestica). La pomal ou mazanal ye un árbol de la familia de las Roseaceae que puede medrar ata 12 m. Florez en primaveira, antias que ruchen las fueyas. El sou frutu, la poma ou mazana, verde, amariella ou roxa, madura n´outoñu. La madeira ye dura y utilízase n´artesanía. Y la "pectina" que contienen las pomas utilízase pa facere sidra y na industria alimentaria, testil y farmacéutica.

Lluplu

2009-08-03T12:17:00.001-07:00

(Humulus lupulus). El lluplu ye una planta trepadora de la familia de las Cannabaceae, bien conocida cumu la causante del gustu amargu de la cerveza. Peru tamién tien mueitas propiedaes y utilízase en melicina cumu sedante, antibiótica, diurética ou pa conciliar el suañu, ente outras. Nos años 70 y 80 el lluplu fou´l "oro verde" de la Ribeira l´Órbigu, y anguañu esta zona ye práuticamente la única que lu produz n´Hespaña.

Yerba de Sayagu

2009-08-03T10:57:00.001-07:00

Senecio jacobaea Esta yerba que pertenez a la familia de las Asteraceae, medra en campos, praos y baldíos. Florez tol branu, ata outubre. Tien un golor poucu prestousu, y ye venenosa pal ganáu.Tien propiedaes sedantes, emenagogas y utilízase pa tratare las varices y la diabetes, ente outros.

Ablanal

2009-08-03T08:11:00.001-07:00

Corylus avellana. L´ablanal ye un pequeñu árbol d´ata 5 m. que pertenez a la familia de las Betulaceae. Florez a finales del hibiernu y entamu la primaveira. El sou frutu, l´ablana, ye ricu en fibra, proteínas, vitaminas, fierru y aceite, y utilízase en confitería en turrones y xocolates. Y tantu las fueyas cumu la corteza tienen efeutos escontra la fiebre y cumu lasante.

Faya

2009-08-03T05:51:00.001-07:00

(Fagus sylvatica). La faya ye un árbol de fueya caduca que puede algamar ata 40m. De la familia de las Fagaceae, medra en suelos frescos y fértiles, a la solombra. El sou frutu, el fayucu, ye ricu n´almidón, aleuronas y sustancias oleosas. Utilízase cumu alimentu pa los gochos. Y la madeira pa facere muebles, traviesas de fierrucarril y mueitas cousas más. Ye un árbol que vive mueitos años (el de la semeya ye un exemplar del "Faedo de Ciñera", la silva miyor conservada d´Hespaña, onde dalgunos d´eillos tienen ata 500 años).

Finoyu de prau

2009-08-01T10:27:00.001-07:00

(Carum carvi). Ata 1 m. De la familia de las Umbelliferae. Tamién conocida cumu alcaravea, cominu de prau. Medra en praos, a la vera los caminos y en sembraos. Las fueyas aseméyanse a las de l´acenoria. Utilízase pa combatire la flatulencia y cumu condimentu na cocina. Florez de xunetu a setiembre.

Papoula

2009-07-30T11:43:00.000-07:00

(Papaver rhoeas). 20-60 cm. Tamién conocida cumu amapola, ababol. Pertenez a la familia de las Papaveraceae, y medra en trigales y tarrenos baldíos. Contién un alcaloide, la roeadina, de suave efeutu sedante y escontra la tos. Y florez d´abril a xunu.

Trébol roxu

2009-07-29T08:16:00.001-07:00

(Trifolium pratense). 50-60 cm. De la familia de las Fabaceae, esta yerba medra en praos y tamién se cultiva cumu pastu pal ganáu. Ye rica en minerales, vitaminas, y utilízase pa tratare las cataratas, pa los síntomas de la menopausia y pa deillas enfermedaes de la piel ("psoriasis, eczemas..."), ente outras. Florez de mayu a setiembre.

Campaniella

2009-07-24T10:38:00.001-07:00

(Convolvulus arvensis). De la familia de las Convulvaceae. Tamién chamada correguela menor. Ye una planta rastreira cun flores en forma de trompeta, rosas ou blancas. Utilízase cumu purgante y pa baixare la tensión. Y florez d´abril a outubre.

Llavanda

2009-07-24T02:10:00.001-07:00

(Lavandula angustifolia). Ye un arbustu d´ata 1 m. Tamién conocida cumu espliegu, cantuesu...Pertenez a la familia de las Lamiaceae, y florez pul branu. Ye una yerba de golor dulce cun propiedaes sedantes, diuréticas, cicatrizantes y utilizada pa combatire la reuma, ente outras. Tamién s´utiliza pa facere perfumes, colonias, xabones, ecétera.

Moreira

2009-07-23T07:04:00.000-07:00

(Morus nigra). 10-15 m. La moreira ou moral ye un árbol de la familia de las Moraceae, orixinariu del sudoeste d´Asia. Medra en suelos frescos y puede aguantare xeladas de -18ºC. Las mouras son ricas en vitamina C. Roxas cuandu tan royas y prietas cuandu maduran; entós el sou almíbar utilízase pa las inflamaciones de bouca y gañote. Las fueyas úsanse cumu alimentu pa los gusanos de seda. La madeira de la moreira val pa facere carros, toneles, mangos de ferramientas, ecétera.

Fleichu

2009-07-19T08:46:00.001-07:00

(Pteridium aquilinum). Ata 2 m. Pertenez a la familia de las Hypolepidaceae. Medra en silvas y sitios frescos. Ye una planta venenosa que contién sustancias canceríxenas.

Yerba llaguneira

2009-07-19T08:09:00.001-07:00

(Ranunculus peltatus). 5-40 cm. De la familia de las Ranunculaceae. Tamién conocida cumu ranúnculu, botón d´ouru, cancel de las ninfas... Ye una yerba anual cun flores de cincu pétalos blancos cul centru amariellu. Medra en cursos d´augua de poucu caudal. Las ramas tan baixu l´augua. Ye una planta venenosa.

Yerbabuena

2009-07-18T06:27:00.000-07:00

(Mentha spicata). 30-90 cm. Pertenez a la familia de las Lamiaceae. Medra en tarrenos frescos cun mueita augua. Pul sou altu conteníu en mentol, tien propiedaes antiséticas, balsámicas y antitusivas. Tamién s´utiliza na cocina, pa facere caramelos, pasta de dientes, etc. Florez pul branu.

Manzaniella

2009-07-18T05:49:00.000-07:00

(Matricaria chamomilla). Ata 60 cm. De la familia de las margaritas, la manzaniella ye una yerba utilizada dende cuantayá cun finxos melicinales, yá que favorez el bon furrulamientu los intestinos.

Tamién tien efeutos antiinflamatorios, antiséticos y cicatrizantes. Medra en tarrenos secos y soleaos, a la vera los caminos y sembraos. Florez pula primaveira y el branu.

Malva

2009-07-18T05:29:00.000-07:00

(Malva sylvestris). 45-90 cm. Pertenez a la familia de las Malvaceae. Tien cincu pétalos púrpura cun rayas más escuras, y las fueyas peludas. Medra a la vera los caminos y en tarrenos baldíos. Florez tol branu, de xunu a setiembre. Y utilízase cumu purgante, p´ablandare furúnculos, pa la tos y la picadura los mosquitos ente outros.

Caléndula

2009-07-14T10:49:00.000-07:00

Calendula officinalis 35 cm Pertenez a la familia Asteraceae. Tamién chamada maraviella, flor de muertu, flor de tol añu (florez tolos meses del añu, inclusive n´hibiernu si nun fai mueitu fríu). El sou nome provién del llatín "calendae", que se refier al primer día del mes. Los romanos tamién la conocían cumu "solsequium" (que sige al sol), yá que s´abre al alboriar y piéchase al atapecere. Utilízase pa las quemaduras, picaduras d´inseutos, cumu cicatrizante, etc.

Yerba de San Xuan

2009-07-14T07:51:00.000-07:00

(Hypericum perforatum). Tamién conocida cumu "hipérico, hipericón". 20-100 cm. Esta planta de pétalos amariellu-doraos, cun pequeños puntos prietos, pertenez a la familia de las Hypericaceae. Tien propiedaes antiespasmódicas, sedantes y antidepresivas. Medra en baldíos y a la vera los caminos. Y florez de marzu a setiembre.

Verbascu

2009-07-10T07:05:00.000-07:00

(Verbascum thapsus)"Gordolobo, barbasco, cirio de Nuestra Señora...". Ata 2 m. Pertenez a la familia de las Escrofulariaceae, de fueyas grandes, cubierta cun pelos espesos y blancos y mueitas flores amariellas n´espigas.Indicada pa las enfermedaes de las vías respiratorias. Medra a la vera los caminos y carreteiras y en tarrenos baldíos y florez pul branu, de xunu a setiembre.

Estramoñu

2009-07-10T04:50:00.000-07:00

(Datura stramonium). 70-150 cm.Tamién conocida cumu yerba del Diañu, floripón, figal llouca, ente outros nomes. Ye una planta tósica de la familia de las Solanaceae, nativa de Sudamérica ya India. Los frutos matan a los mures, pulu que tamién se la conoz cumu "matatopos". Los sous principios autivos son l´atropina, la hiosciamina y la escopolamina, pulu que val pa tratare l´asma, la tos, cumu sedante y antiinflamatoria. Las flores blancas asemeyan trompetas, y las fueyas tienen un fuerte golor. Medra a la vera los caminos, en baldíos y n´escombreiras. Y florez de xunetu a setiembre.

Milfueyas

2009-07-09T05:53:00.000-07:00

Achillea millefolium Tamién conocida cumu milenrama, cientoenrama, yerba d´Aquiles, ecétera.De la familia de las Asteraceae. Los griegos chamónunla asina n´honor a Aquiles purque la utilazaba pa curare las feridas a los sous soldaos.Ta indicada n´hemorraxas, mancores mestruales, de bandullu, pa la falta memoria, la flebitis, las varices, las almorranas. Medra en praos y a la vera los caminos. Davezu las flores son blancas y tamién rosas ou roxas. Florez de xunu a agostu.

Cirigueña

2009-06-30T04:46:00.000-07:00

(Chelidonium majus). Celidonia mayor, yerba verrugeira, yerba d´andurinas. 30-90 cm. Pertenez a la familia de las Papaveraceae. La savia, de color naranxa viva ye venenosa. Los frutos son vainas llargas. Davezu alcuéntrase en setos y murias y florez de mayu a agostu.
Chelidonium quier dicire "golondrina pequeña", ya qu´esta planta florez cuandu arriban las andurinas pula primaveira. Utilízase pal tratamientu las verrugas y pa mueitas cousas más, d´ehí el conocíu dichu popular "la cirigüeña de todos los males es dueña".

Dedaleira

2009-06-30T04:15:00.001-07:00

(Digitalis purpurea). De la familia de las Scrophulariaceae. Tamién conocida cumu "calzones de raposu ou restrallete" (Cabreira). Ye una espiga alta, d´ata 150 cm. cuyas flores d´abaixu ábrense antias que las d´enrriba. Tien cincu pétalos uníos formandu un llargu tubu, y las fueyas grandes, gruesas, ovaladas y peludas. Medra en biescas y a la vera los caminos y florez de xunu a setiembre.La dixitalina ye´l principiu autivu d´esta planta, un venenu dañible utilizáu pa dalgunas enfermedaes del coral.

Diente de llión

2009-06-29T08:34:00.000-07:00

(Taraxacum officinale). 30-40 cm. Esta planta de la familia de las Asteraceae, tamién conocida cumu achicoria amarga ou taraxacón, medra en campos cultivaos, a la vera los caminos y yerbazales. Mui rica en vitamina A, B y C, y en deillos minerales (fierru, calciu, fósforu), tien propiedaes cumu diurética, purgante, cicatrizante, y pa tratare l´anemia, almorranas, varices, nefritis, ecétera. Antañu utilizada en vez del café. Florez de marzu a outubre.

Capilote

2009-06-29T08:08:00.000-07:00

(Narcissus pseudonarcissus). 20-35 cm. Pertenez a la familia de las Amaryllidaceae. Las fueyas llargas y estreichas, salen del bulbu. La flor ye un tubu interior arrodiáu pur seyes piezas que terminan en punta. Tien propiedaes eméticas, antiespasmódicas y febrífugas, y tamién s´utiliza escontra la tos ferina y la tos nerviosa. El golor de las flores tien efeutos narcóticos. Ta en peligru de desapaición. Medra en silvas y praos y florez de febreiru a abril.

Flora del País Llïonés

2009-06-29T07:57:00.000-07:00

Cuna arribada la primaveira y el branu a los montes y praos llïoneses, flores y plantas guapas asgaya ruchan pur tolos llaos.
Eiquí deixu unos poucos exemplos d´esta gran variedá qu´esperu vos presten.
¡Regalaivos!.

Dolmen "El Tesoro"

2009-03-28T16:12:00.000-07:00

El dolmen "El Tesoro" en Morales del Rei, fou escaváu y restauráu en 1995.

Debe´l sou nome a una ayalga de monedas de bronce de dómina romana, alcontrada van años.

Ye un sepulcru de corredor, cun cámara circular y un pasiellu d´entrada. Feichu cun piedras piqueñas y cubiertu cun un túmulu.

Ritual d´enterramientu

2009-03-28T16:04:00.000-07:00

Los calabres yeran enterraos en posición fetal y acompangaos d´una riestra oxetos y piezas cun sinificáu

simbólicu-ritual.

Dolmen "El Casetón de los Moros"

2009-03-28T15:38:00.000-07:00

El dolmen conocíu cumu "El Casetón de los Moros", n´Arrabalde, data del 3500/3000 a. C. y fou escaváu en 1987. Ye un sepulcru de corredor cun cámara funeraria paracircular y pasiellu d´entrada orientáu al S.E. Nun se conservan restos del túmulu. Ta feichu cun grandes piedras de cuarcita afitadas sobru fosas escavadas nel suelu.

Conservaba cincu piedras de la cámara y una más dientru´l recintu, asina cuma la marca las llousas desapaecidas.

Dólmenes na Sierra de Carpurias

2009-03-28T15:04:00.000-07:00

Los dólmenes son un xeitu d´enterramientu megalíticu (mega=grande, lithos=piedra), prauticáu nel Neolíticu a mou de panteones onde s´enterraba a los muertos de las desemeyadas dóminas d´una mesma familia ou comunidá.
Tan feichos cun bloques de piedras pinaos que delimitan una cámara funeraria, tou eillu tapáu cun un túmulu de tierra que fae que la sepultura seya más monumental (el de la semeya nun lu conserva).
Los calabres yeran depositaos na cámara central, xeneralmente en posición fetal y acompangaos d´una riestra oxetos y ufiertas cumu útiles de siles talláu, machaos pulimentaos, deillos oxetos d´adornu, vasos de cerámica, asina cumu piezas cun sinificáu simbólicu-ritual (ídolos, espátulas de guesu, prismas de cuarzu).
El feichu de que los individuos d´una familia ou grupu s´enterrasen na mesma tumba y l´esfoutu que suponía la sua costruición amuesan l áltu gráu de unión y muerganización social qu´había ente estas xentes.

San Adrián del Valle: Un pueblu cun mueita hestoria

2009-03-20T12:48:00.000-07:00

Situ na llende cuna provincia Zamora, San Adrián del Valle, ye un pueblu de Llión de 131 habitantes, que pertenez al Partíu Xudicial de La Bañeza. A 62 km de la capital y a una altitú de 737 m.
La hestoria d´esti pueblu ta unida a la d´un Monasteriu de la Edá Media dedicáu a San Adrián y Santa Natalia, afitáu nu qu´anguañu ye San Adrián del Valle. Esti monasteriu apaez nomáu nel bien conocíu "Tumbo Negro de Astorga" nel añu 924, añu nel que´l sou abad Peraze, merca unos tarrenos averaos al ríu Órbigu. Más alantre, nel añu 957 y siendu abad León, apaez la primer donación de bienes al monasteriu de San Adrián pur parte un matrimoñu que dona tolas suas posesiones (montes, praos, fontes, llagunas, llinares, guertos...) ente los ríos Aria (anguañu Eria) y Órbigu.

Dous años más tarde, nel 959 hubu una nueva donación pula qu´outru matrimoñu dona al monasteriu una villa de nome "Alcanastro".

Asina entama la hestoria d´un pueblu nel que sieglos más tarde, allá pur 1918 costrúyese la que dica guei ye la cueva más grande la provincia: "La cueva de Doña Rosa", y na que nos sous miyores tiempos chegonun a trabayar unas 60 presonas.

A la mesma familia tamién pertenez l´antigua "Alcoholera", qu´anque va mueitu tiempu nun furrula, entá sige en pie.

Toos estos datos dannos una ideya d´ún de los pueblos, d´aqueilla más prósperos de tola contorna.

Peru si dalgu recampla nel paisax d´esti fermosu pueblu llïonés son las numerosas cuevas-bodegas, salpicadas purdayures a las afueras del pueblu, nas que tradicionalmente se faía vinu nos llagares, y nas qu´entá guei se sige faciendu.

Fonte n´Iruela

2009-03-09T12:30:00.000-07:00

Fonte restaurada
n´ Iruela

Ermita d´Iruela

2009-03-09T12:26:00.001-07:00

Ermita d´Iruela, dedicada a

San Antón.

El Reloxeiru ya Iruela

2009-03-09T11:39:00.001-07:00

Iruela ye un pueblu de 21 habitantes, situ a 1210 m d´altitú que pertenez al municipiu de Trueitas, en Cabreira Alta, a 65 km de La Bañeza y 80 d´Estorga, Partíu Xudicial al que pertenez. Tien una Eigrexa Parroquial, una Ermita dedicada a San Antón, unas antiguas escuelas, una fragua y un molín, tóu eillu restauráu nos cabeiros años.

Peru lu primeiru que nos atoupamos al arribar a Iruela, ye´l Monumentu al "Relojero Losada", llevantáu en 1993 pulos propios vecinos.

José Rodríguez Losada, nacéu en Iruela, en Mayu y 8, 1797. Fiyu de Miguel Rodríguez y María Conejero, utilizóu l´apellíu Losada n´homenax a la sua tierra, a la xurisdición a la que´l sou pueblu pertenecía.

Sigún l´hestoriador Matías Rodríguez, siendu un mozu de 17 años, José yera pregeiru cuandu perdéu una vaca. Al chegar a la sua cá, mandónunye tornare pur eilla, y cuandu descubríu que taba muerta, ablucáu pulas consecuencias qu´aqueillu trayería, escapóu del pueblu ata chegar a La Puebla de Senabria. Eillí recoyéulu un arrieru que lu llevóu p´hacia Estremadura.

El sou collaciu, el poeta y dramaturgu, José Zorrilla cunta la sua escapada d´Hespaña. Persigíu, arriba a Llondres aú entama cumu mozu de llimpieza nuna reloxería, casóu cuna viuda l´amu y algamóu a ser el primer cronometrista d´Inglaterra y proveedor de cronómetros pa la Marina Hespañola.

N´Hespaña toos conocemos a esti ilustre presonax llïonés pur ser el reloxeiru que fizu y donóu a la Villa de Madrí´l Relox de la Puerta del Sol.

Percha de cardos

2009-03-02T12:19:00.000-08:00

Nos rodiellos van metíos los cardos cun unos piqueños soportes metálicos.

Percha de cardos furrulandu

2009-03-02T11:14:00.000-08:00

Percha de cardos furrulandu.

Sacandu´l pelu a las famosas

mantas del Val.

Batán Muséu del Val de San Lorenzo

2009-03-02T10:41:00.000-08:00

Cuatru fonun los batanes ou pisones qu´hubu cuantayá n´esti fermosu pueblu maragatu, a 6 km d´Estorga, que ye Val de San Lorenzo.
Un d´eillos ye´l que guei se conoz cumu´l Batán Muséu, afitáu a la entrada´l pueblu y a la vera´l Ríu Turienzu.
El batán ye una máquina davezu hidráulica, cun unos gruesos mazos de madeira, movíos pur un eixe, pa golpeare, desengrasar y enfurtire los paños; y tamién se chama asina al edificiu nel qu´esta máquina furrula.
Nel casu del Val, el Batán Muséu ye l´edificiu averáu al ríu, nel qu´al traviés d´una presa y una canal se almacenába y conducía l´augua pa que moviera la rueda que faía furrulare los mazos del pisón.
Anque los primeiros batanes yeran de madeira, movíos pula fuercia hidráulica, años más tarde entamonun a furrulare cun lleutricidá.
Nel Batán Muséu hai amás una pila, un llavadeiru y una centrifugadora, p´ablandare, llavar y escurrire la llana ou las mantas abatanadas, respeutivamente.Y dúas perchas de cardos pa sacar el pelu a las mesmas. Pa facer esti trabayu a manu, utilízase la cardencha ou cardón que se cultivan n´Alicante y Albacete. Y pa desengrasare los paños usábase ata va bien poucu la greda, arcilla arenosa sacada del Sierru d´Estorga.
Una visita imprescindible pa conocere la Industria Testil del Val, xeitu de vida d´estas xentes dende van deillos sieglos.